Во основните и средните училишта денеска на настава се сите вработени откако вчера заврши предупредувачкиот штрајк на наставници членови на СОНК и тие што солидаризираа со нив.

Штрајкувачите вчера беа на работа без работни обврски, а оние што не пристапија имаа часови. Во училиштата кои не истакнаа известувања дали ќе организираат настава, учениците и нивните родители самите ја решаваа дилема дали да го слушаат повикот од МОН да се дојде на училиште или на СОНК да не се доаѓа.

Некои родители на помали деца  избраа наставата да ја почнат денеска за да бидат сигурни дека тие ќе бидат згрижени. Првачињата, главно, секаде беа прифаќани, а во повеќе училишта беа организирани и приредби за почетокот на нивното основно образование.

Предупредувачкиот ден помина со исти позиции на МОН и СОНК околу платите на наставниците – министерот Арбер Адеми со аргументот дека за 10,8 отсто им се зголемени платите од август 2018 до септември 2019, а лидерот на СОНК Јаким Неделков со укажување дека државата им должи уште онолку проценти за колку што е зголемена минималната плата во државата, или до 25 отсто.

– Не се штрајкува кога имаме одлука за повисока плата за нови 5 проценти од септември.  Со СОНК имаме коректен и конструктивен  социјален дијалог и ќе го продолжиме. Ќе ги разгледаме сите податоци и аргументи и во партнерски однос со Синдикатот ќе одлучиме како Влада за идното покачување на платите на наставниците,  изјави Адеми.

Лидерот на СОНК, пак, задоволен од одѕивот на наставници вклучени во штрајкот во сите општини, порача дека „веќе е време да се отворат картите зашто песочниот часовник одбројува“. Очекува преговори со МОН во текот на септември од кои ќе зависат нивните следни чекори наредниот месец.

– Месеци наназад немаме конкретна понуда колку и од кога. Мислам дека во септември веќе картите ќе бидат отворени затоа што песочниот часовник одбројува. До крајот на септември ние мора да изнајдеме заемно прифатливо решение во однос на прашањето за зголемување на платите за во октомври да знаеме што понатаму, изјави Неделков.

И додека МОН и СОНК ќе преговараат за да договорат  проценти за платите, за околу 260 илјади средношколци и основци почна нова учебна година. Според податоците на МОН, околу 20 000 од нив се првоодделенци.