Македонски железници- Транспорт пушти во сообраќај три нови електролокомотиви во вредност од 6.414.000 евра, набавени од кинески ЦРРЦ.
Со испораката целосно се реализира Договорот за набавка на четири електролокомотиви од кинеската компанија, во вкупна вредност од 8.678.600 евра.
Од Железници Транспорт велат дека со пристигнувањето на новите електро локомотиви, се заокружува Проектот за ревитализација на возниот парк и оти тоа претставува големо задоволство за нив имајќи предвид дека последните локомотиви кои се купени датираат пред 45 години, во далечната 1975 година.
– Освен што ќе го зајакнат транспортниот капацитет на железницата и значително ќе ги намалат трошоците за одржување ќе дадат голем придонес и кон домашната економија и зачувување на животната средина, изјави директорот на Железници Транспорт, Орхан Муртезани.
Како што потенцираат од Македонски железници, електро локомотивите се изработени согласно со најстрогите европски директиви, критериуми и стандарди и ќе овозможат поквалитетен, побрз и побезбеден железнички превоз на пругите на територијата на нашата држава.
Овој проект, како што е познато, го почна ВМРО-ДПМНЕ додека беше на власт со премиерот Никола Груевски. Тогаш почна обновата на нови патнички и транспортни гарнитури за Македонски железници, а сега пристигнуваат веќе нарачаните.
