Бројот на починати од коронавирусот во Њујорк, најголемото жариште во САД, ја надмина бројката од 10.000, откако здравствените власти додадоа повеќе од 3.700 лица за кои се сомнева дека починале од Ковид-19, но не биле тестирани.
Ова е вознемирувачко зголемување на стапката на смртност во Њујорк, со што се зголеми вкупниот број на починати во САД за дури 17 проценти, пренесува Њујорк Тајмс.
Здравствените власти во Њујорк забележаа уште еден мрачен факт: епидемијата веројатно индиректно довела до зголемување на смртноста кај граѓаните кои можеби никогаш не биле заразени. Во Њујорк, во периодот помеѓу 11 март и 13 април, починале три илјади повеќе отколку во истиот временски период во „нормална“ година.
Иако овие смртни случаи не биле експлицитно поврзани со вирусот, до нив можеби не би дошло доколку не се појавеше епидемијата, делумно затоа што здравствениот систем е потресен и окупиран од случаи на коронавирус.
