Бугарите најчесто во ЕУ биле подведувани да купуваат фалсификувана стока. Ова го објави канцеларијата на ЕУ за интелектуална сопственост, повикувајќи се на сопствено истражување.
Според истражувањето, во Бугарија секој петти човек (19 отсто) купувал фалсификат, за разлика од просекот во ЕУ – девет проценти. Во исто време, само шест отсто од анкетираните Бугари велат дека намерно би купиле лажен, додека 80 проценти претпочитаат да земат оригинален производ доколку се понуди на пазарот.
Бугарските компании, исто така, најмногу се жалат на повреда на нивните трговски марки и патенти – 39,7 проценти во споредба со 25 отсто, колку што е просекот за ЕУ.
Европската агенција известува дека само девет проценти од европските компании имаат патенти, но секој трети известува за губење на прометот, нарушување на угледот, а 15 отсто страдаат од загуба на конкурентска предност поради кршење на нивните права на интелектуална сопственост.
Фалсификатите сочинуваат 6,8 отсто од увозот на ЕУ или стока вредна 121 милијарда евра, почнувајќи од облека до електроника, од играчки до вино.
Уделот на луѓе кои купиле фалсификувана стока значително се разликува во одделни европски земји – од два проценти во Шведска, преку девет отсто во Франција до рекордот во Бугарија од 19 проценти. Општо земено, се чини дека проблемот ги зафаќа повеќе источноевропските земји и речиси го нема во нордиските земји. Измамени купувачи, кои поднеле пријава до европската агенција која управува со брендови и дизајни се 16 проценти во Романија и 15 отсто во Унгарија. Во исто време, во Данска тие се само три проценти.
Во услови на неверојатниот бум на електронска трговија поради пандемијата, 70 отсто од Европејците купувале преку Интернет во 2020 година, според Евростат.
Способноста да се разликуваат фалсификувани од оригинални производи останува проблем за граѓаните на ЕУ, забележува Управата за интелектуална сопственост на ЕУ. Секоја трета личност не знае како да разликува оригинал од лажен производ. Тие предупредуваат дека се зголемува снабдувањето со фалсификувани лекови и медицински производи и нагласуваат дека оригиналните вакцини против Ковид-19 не можат да се најдат на Интернет.
Европската агенција посочи и на профитабилниот пазар за пиратска телевизиска содржина, кој е достапен на Интернет и изнесува речиси една милијарда евра.
Дневник.бг
