Градбите се легални, но концесиите им се истечени, вака градоначалникот Рамиз Мерко вечерва го објасни случајот со платформите на струшкото крајбрежје кои, според него, вчера не се рушеа, туку доброволно се отстрануваа, во согласност со сопствениците.

Мерко останува на тврдењето дека во Струга нема дивоградби, а за платформите, смета, треба да се бара решение зашто во нив, како што нагласи, се вложени многу пари, а нејлесно е да се руши.

-Немаме урнати објекти, туку доброволно се отстрануваат платформи. Без разлика што концесиите се истечени, тие се единствена „понуда“ за туризмот во Струга, а и во Охрид. Бараме како да ги средиме овие работи, зашто лесно е да се руши. Се работи за десет концесионери, од сите нив можеби ниту еден не е на моја страна, но јас така тоа не го гледам, туку го гледам во интерес на развојот и турстичката понуда на градот. За се може да се направи план, истакна Мерко во гостувањето на „Топ тема“.

Тој во овој мандат побарал од Владата и очекува да се донесе план за струшкото крајбрежје. Општината има план за повеќе од 30 концесии во градот.

-Треба да се седне со сегашните концесионери зашто имаат многу средства вложени, треба да се направи проценка на тоа и да се види до каде е состојбата. Некој дозволил да имаат такви скапи градби и сега преку ноќ ќе ги рушиме. Лесно е да се руши, тешко е да се гради. За се има разговори и преговори, со еколозите, граѓаните, институциите. Овие платформи се издадени со проектна документација во 2010 година од Министерството за транспорт и врски. Не се уриваат тие платформи, туку се отстрануваат во разговор со концесионерите, помината им е концесијата, но без разлика на тоа сакаме со благи зборови  да направиме нешто да не правиме штета. Ние сме туристички град, а тоа значи дека треба да има сигурност, ред. Затоа седнав со концесионерите, истакна Мерко.

Тој ги отфрли како шпекулации информациите дека наводно се гради некаков објект, ако се гори дел од трската.

– Мене ме напаѓаат зошто се гори трската. Многу жално, јас не сум чувар на трска. За чување имот, лица и капитал има институции, полиција. Се шпекулира дека со секое потпалување ќе никнат хотели, а 20 години во тој дел не е никнат ниту еден таков објект. Тоа е шпекулација која оди во прилог на уназадување на градот и бизнисот. Пвеќето од половина површина во градот е дива вегетација, змијарник, места каде децата се дрогираат, непроодни површини. Тоа се прави со цел за некој да ја уназади општина Струга, што не дозволува тоа да се среди. Ако имало 10 хектари под трска, сега има 50 хектари, посебно во делот каде се загадува и тие делови треба да се расчистат, нагласи Мерко.

Охридскиот градоначалник Константин Георгиевски кој исто така гостуваше во „Топ тема“, но онлајн, не кажа кога ќе почне уривањето на дивоградбите во Охрид. -Не верувам дека наредниве месеци ќе имаме средства, можно е после изборите, во октовмри, ноември, рече Георгиевски.