Денеска се изврши петтата трансплантација на срце и ми е мило што со овој чин е спасен човечки живот и е подобрен квалитетот на живот на двајца други пациенти, изјави попладнево министерот за здравство, Венко Филипче за органите донирани од 42-годишна пациентка.
Тој упати голема благодарност до семејството на починатата пациентка, која за жал имала спонтано крварење во главата и мозокот и практично била прогласена мозочна смрт.
-Сопругот и братот ја исполнија нејзината волја, која ја искажала за време на животот, за донирање на органите, информира Филипче.
Трансплантацијата на срце е направена кај пациент кој подолго време бил на листата за трансплантација, а бубрезите ќе бидат трансплантирани кај двајца пациенти на 40-тина години кои одат на дијализа.
За настанот Филипче информираше и преку својот ФБ профил:
Министерот за здравство Венко Филипче на својот Фејсбук профил напиша дека срцето на хуманата сограѓанка продолжи да чука во градите на човек кој добива втора шанса за живот.
„Органодарителството е највисок акт на хуманост. Држиме среќа телото да го прифати новиот орган“, додава Филипче.
