Пакистанскиот парламент, откако гласаше за смена на премиерот Имран Кан, утре треба да гласа за нов премиер, а најверојатен кандидат за оваа функција е Шебаз Шариф, помладиот брат на поранешниот премиер Наваз.
Шебаз Шариф (70), најверојатно следниот, 23-ти пакистански премиер, е малку познат надвор од неговата земја, каде што има репутација на ефективен функционер и менаџер и е помлад брат на Наваз Шариф, кој беше премиер во три наврати, пишува Ројтерс.
Долниот дом на пакистанскиот парламент во неделата гласаше за смена на премиерот Имран Кан, одлуката беше донесена по речиси 14 часа спорови меѓу членовите на опозицијата и владејачката партија на Кан, а иницијативата на опозицијата, како нејзин кандидат за премиер, беше предводена од Шебаз.
Аналитичарите велат дека Шебаз, за разлика од Наваз, ужива пријателски односи со пакистанската војска, која традиционално ја контролира надворешната и одбранбената политика и 220-милионската јужноазиска земја, која поседува нуклеарно оружје.
Пакистанските генерали биле директно вклучени во соборувањето на цивилните влади три пати, а ниту еден премиер не завршил цел петгодишен мандат од 1947 година и независноста на Пакистан од Британија, потсетува Ројтерс.
Шебаз е најпознат по неговиот директен и ефективен стил на управување, кој го претстави како главен министер на најнаселената пакистанска провинција Пенџаб, кога тесно соработуваше со Кина на амбициозни инфраструктурни проекти финансирани од Пекинг.
Во интервју минатата недела, Шебаз рече дека добрите односи со САД се клучни за Пакистан, за разлика од антагонистичките односи на Кан со Вашингтон. Имено, Кан, легендарниот поранешен играч на крикет кој ја презеде функцијата во 2018 година, се обиде да го обвини Вашингтон за своите проблеми и официјално протестираше до американската амбасада поради наводниот заговор за соборување на неговата влада.
