Според новите извештаи, труењето на ученички во Иран е многу подраматично отколку што се мислеше.

Со месеци од таа земја се шират вести за труење на десетици девојки кои учествувале во протестите, а сега е откриено дека веројатно бројката достигнува 900 отруени.

Вчера, иранскиот полунезависен Мехр њуз објави дека Шахријар Хејдари, пратеник во парламентот, цитирал неименуван „сигурен извор“ кој рекол дека досега се отруени „речиси 900 ученички“ од целата земја, пренесува Си-Ен-Ен.

Првото пријавено труење се случило во градот Ком на 30 ноември, кога 18 ученички од средно училиште биле хоспитализирани, јавуваат иранските државни медиуми. Во друг инцидент во Ком на 14 февруари, повеќе од 100 ученички од 13 училишта биле пренесени во болници по, како што објави новинската агенција Тасним, „сериски труења“.

Имало извештаи и за труење на ученички во главниот град Техеран каде 35 биле хоспитализирани вчера, според Фарс њуз. Тие биле во „добра“ состојба, а многу од нив подоцна биле ослободени, пренесува Фарс. Државните медиуми објавија и за труење на ученички во последните месеци во градот Боруџерд и во провинциите Чахармахал и Бахтијари.

Иранскиот министер за здравство Бахрам Еинолахи, кој ги посетил болните ученички во Ком, на 15 февруари рече дека симптомите вклучуваат мускулна слабост, гадење и замор, но дека „труењето“ е благо, според извештајот на државните медиуми, Иранската новинска агенција. Министерот за здравство, Јунес Панахи, задолжен за истражување и технологија, на 26 февруари рече дека труењата се „хемиски“, но дека соединенијата не се препознаваат како оние што се користат во војување и дека симптомите не се заразни, според ИРНА.

Панахи додаде дека се чини дека труењата се намерни обиди да се таргетираат и затворат училиштата за девојки, според ИРНА.

„По труењето на неколку ученички во Ком, стана јасно дека луѓето сакаат да ги затворат сите училишта, особено училиштата за девојки“, рече Јунес Панахи на прес-конференција во неделата, според иранскиот државен медиум ИРНА. Тој подоцна го отфрли коментарот, велејќи дека бил погрешно цитиран, пишува Фарс вести.

Локалните активисти и политичари ја повикаа владата да стори повеќе за да го истражи труењето. Сè повеќе луѓе веруваат дека труењата може да се поврзат со неодамнешните протести на движењето „Жени, живот, слобода“.