Украина воспоставува привремена поморска рута за одржување на пратки со жито, откако Русија се откажа од договорот со кој се дозволува украински извоз на жито преку безбеден коридор поддржан од ОН, објави денеска Киев во официјално писмо.
Вчера Русија втора ноќ по ред го нападна украинското црноморско пристаниште Одеса, откако во понеделникот се повлече од договорот за безбеден извоз на жито од украинските пристаништа.
Во Меѓународната поморска организација на ОН, Украина соопшти дека „одлучила привремено да воспостави препорачана поморска рута“. „Целта е да се олесни деблокирањето на меѓународната пловидба во северозападниот дел на Црното Море“, вели во писмото Васил Шкураков, вршител на должноста министер за заедници, територии и развој на инфраструктурата на Украина.
Во писмото се наведува и дека дополнителната рута води до територијалните води и ексклузивната поморска економска зона на соседна Романија. Украинскиот претседател Володимир Зеленски рече дека договорот за жито од Црното Море може да продолжи без руско учество, а Украина работи на опции за исполнување на обврските за снабдување со храна.
По повлекувањето на Русија од договорот, осигурителните компании испитуваат колку е безбедно да се склучуваат договори со украински бродови. Објектот за осигурување на товарот што обезбедуваше покритие за пратките преку претходниот договор за коридор е суспендиран, изјави брокерот Марш.
Дополнителните премии за осигурување од воен ризик, кои се наплаќаат при влез во Црното Море, мора да се обновуваат на секои седум дена.
