ДУИ: Скандал е тоа што на српската заедница и се дадени 90 отсто од парите од програмата за Охридскиот договор постигнат со жртва на Албанците

Она што беше јавно потврдено од самите претставници на Владата претставува невиден скандал и сериозен аларм за правецот во кој се турка државата. Владата, во која ВЛЕН беше избран од ВМРО-ДПМНЕ како најсоодветен и најпослушен партнер, додели околу 90 проценти од средствата од програмата за спроведување на Охридскиот договор на организации на српската заедница, се наведува во соопштението од ДУИ, што МИА го објавува интегрално.

Охридскиот договор, постигнат по жртвата и политичката борба на Албанците за еднаквост, денес оваа Влада го користи за финансирање на политичките и идеолошките приоритети на друга заедница, додека на Албанците им се укинуваат механизмите за застапеност, им се одзема јазикот од институциите, се отстрануваат од раководните позиции и се заменуваат во државната администрација.

Кога приближно 90 проценти од една програма завршуваат во една насока, станува збор за однапред умислена владина политика.

Настанот станува уште поалармантен во време кога политичкото, институционалното, културното и медиумското влијание на таканаречениот проект „Српски свет“ е сè поочигледно во Северна Македонија. Институциите постепено се ставаат во служба на агенда што ја оддалечува државата од нејзиниот мултиетнички карактер, од духот на Охридскиот договор и од евроатлантската ориентација.

ВЛЕН денес треба да им одговори на Албанците:

Што добија Албанците од нивното претставување, кога дури и средствата од Охридскиот договор речиси целосно им се доделуваат на други?

ВЛЕН повеќе не е само нем набљудувач на деградацијата на Албанците. Тој е активен дел од механизмот што ја спроведува.

ДУИ бара итно објавување на целосната листа на корисници, износот доделен за секој проект, составот на комисијата за евалуација, доделените бодови и записникот од процесот на одлучување.

Овој скандал мора институционално и политички да биде истражен. Охридскиот договор не смее да се претвори во инструмент за унапредување на „Српскиот свет“, додека на Албанците секојдневно им се одзема по едно право.

Молкот на ВЛЕН пред овој скандал е најјасната потврда зошто токму нив ВМРО-ДПМНЕ ги избра за свои партнери во Владата.

Фото: Архива