Сојузот на Македонците со исламска религија (СМИР) ги повика граѓаните на Албанија, Македонци по етничка припадност, а муслимани по верска припадност да не потклекнуваат под никаква закана и да се изјаснат тоа што се – Македонци.
„Ги повикуваме нашите сонародници во Албанија на пописот кој е во тек да не дозволат никој, ама никој и по ниедна цена да им ја менува нивната македонска етничка припадност и по цена на не знаеме какви пасоши и привилегии да им се нудат“, пишува во повикот на СМИР.
Порачуваат дека „сѐ е менливо освен етничката припадност“.
– Барањето Бугари во чисти македонски етнички средини преку разни емисари ќе предизвика тешки историски последици по идните поколенија.
Сте биле, сте и останете и понатаму она што единствено сте Македонци“, се наведува во пораката на СМИР, потпишана од претседателот Латиф Пајкоски.
Пораката доаѓа по засилената бугарска пропаганда меѓу Македонците со исламска вероисповест и притисокот врз нив да се попишат како Бугари.
