Откако Белата куќа се закани со ново одземање на акредитацијата на новинарот Џим Акоста, од Си-Ен-Ен го повикаа сојузниот суд на итна расправа потсетувајќи дека суд пред три дена донел одлука од „ограничена природа“ со која на новинарот му се враќа привремено акредитацијата на две недели додека не се одлучи за таа тужба која во меѓувреме ја поднесе медиумот.
Белата куќа сега му испрати писмо на Акоста, во кое наведува дека донеле „прелиминарна одлука“ за укинување на акредитацијата по завршувањето на периодот предвиден со судскиот налог.
Администрацијата на Трамп пред две недели му ја одзеде акредитацијата на Акоста откако тој го оспори ставот на Трамп дека карванот мигранти од Централна Америка е „инвазија“. Белата куќа исто така го обвини новинарот за грубост кога помошничката од Белата куќа се обиде да му го одземе микрофонот , иако видеото покажува дека Акоста не беше агресивен со неа.
Минатата недела судија донесе одлука од „ограничена природа“, со која на Акоста привремено му се враќа акредитацијата. Во меѓувреме, Си-Ен-Ен поднесе тужба против американската администрација поради кршење на Шрвиот и Петтиот амандмант од Уставот на САД.
„Непрописното одземање на акредитациите го крши правото на слободата на печат на Си-Ен-Ен и на Акоста кои произлегуваат од Првиот амандман за слободата на печатот и Петтиот амандман за правото на правичен процес“, стои во соопштението на Си-Ен-Ен.
