Две третини од вработените во Македонија земаат под просечна плата. Според податоците од Управата за јавни приходи , во јануари годинава речиси 390 илјади вработени земале под просекот за првиот месец од годинава. Според официјална статистика во Македонија во 2023 година биле вработени 688 295 лица што значи дека за 56 отсто од вработеното население просечната плата со која власта се фали на сите страни останува само пуста желба, објавива АЛФА.
Управата за јавни приходи ве информира дека согласно податоците со кои располага за месец јануари 2024 година, од поднесени и уплатени МПИН пресметки за 389,444 вработени, им била пресметана нето плата до 39. 542 денари , за месец февруари 2024 година, нето плата до 39. 542 денари била пресметана на 365,321 вработени, информираат од УЈП за Алфа
Бројките се повеќе од јасни – Со една просечна плата од скоро 40 илјади денари не можат да се задоволат ни основните потреби на едно четиричлено семејство. Минималната синдикална кошничка во март 2024 изнесува скоро 1000 евра или со една просечна плата се полни само 67 проценти од кошничката. Што значи дека дури и двајца родители да се на минималец нема да можат да си го прехранат семејството. И граѓаните не се сложуваат со фалбите на власта, велат дека во Македонија ретко кој заработува просечна плата.
Според последните податоци просечната плата во Македонија е за 500-тини денари помалку од декември минатата година кога изнесувала 39.998 денари. Власта и овој пат не пропушти да се пофали дека благодарение на успешните политики платата пораснала. Статистички е така, но при фалбите не споменуваат дека во просекот влегуваат и нивните покачени плати за 78 отсто
За дванаесет месеци бележиме раст од 5.599 денари. Овој раст на просечната плата за јануари е чекор пред трошоците. Стапката на инфлација за овој месец изнесуваше 3,2%, што зборува за реален раст на платата и куповната моќ на граѓаните за 13,3%. Во нашата социјалдемократска визија на постојаниот раст на платите гледаме како на еден од основните столбови на социјалната правда во државата, напиша вицепремиерот за економски прашања Фатмир Битиќи.
И додека власта се фали, Македонија изминативе месеци се најде на дното во регионот по висина на минимална плата. Растот на минималецот од следниот месец ќе го зголеми просекот повторно, но тоа ќе биде само на хартија, оти стандардот нема да се подобри зашто голем дел од вработените живеат со минимални приходи.
