Археолозите откриле приватен спа комплекс во Помпеја каде посетителите и гостите се капеле пред да тргнат на раскошни гозби, објави денеска една италијанска веб-страница.
Бањите откриени во римска вила се еден од најголемите приватни термални комплекси некогаш откриени во античкиот град во близина на Неапол, уништен во ерупцијата на Везув пред речиси 2.000 години, објави Би-Би-Си.
Археолозите заклучиле дека посетителите се соблекле во специјална соблекувална која, судејќи по клупите пронајдени таму, може да соберат до 30 луѓе. Потоа се релаксирале во калидариумот, соба со топла бања, па во тепидариумот, топла соба и на крајот се нуркале во базен со ладна вода во фригидариумот. „Ладната соба е многу импресивна. Се состои од 10 метри долг двор со трем, во чиј центар се наоѓа голем базен“, опишуваат археолозите.
По уживањето во спа третманот, гостите вечерале со свеќи во сала чии ѕидови биле обоени во црно и украсени со фрески кои прикажуваат сцени од грчката митологија. Салата и термалниот комплекс се дел од големата вила на која две години работеле археолозите.
Директниот премин од термалната област до големата социјална просторија сугерира дека римската вила била погодна за организирање раскошни приеми, се наведува во соопштението. Ваквите приеми веројатно претставуваа драгоцена можност за неговиот сопственик да обезбеди изборен консензус на своите гости, да промовира кандидатура на пријател или роднина или едноставно да го потврди својот социјален статус. По застрашувачката ерупција на Везув во 79 н.е., пепелта, лавата и карпите што паѓале, прекриле многу од зградите на Помпеја кои се зачувани до денес во речиси нивната првобитна состојба.
Вкупниот број на загинати не е познат, но управата на археолошкиот локалитет Помпеја открива дека за време на ископувањата биле пронајдени останки на повеќе од 1.000 жртви, совршено сочувани и обложени во повеќе слоеви пепел што паднале врз градот. Се вели дека во времето на вулканската ерупција, во Помпеја живееле околу 13.000 жители. Остатоците од градот биле откриени дури во 16 век, а организираните ископувања започнале околу 1750 година.
Во поново време, вниманието е насочено кон напорите да се запре влошувањето и уривањето на вредните згради. Помпеја денес е под заштита на светското наследство на УНЕСКО и е второто најпосетувано туристичко место во Италија, по Римскиот Колосеум.
