Неколку медицински сестри кои работеле на ист кат во болница во Бостон, во американската сојузна држава Масачусетс, се разболеле од тумори на мозокот, но истрагата на болницата утврдила дека во таа установа немало никаков ризик за околината, што наишло на сомнеж од синдикатот на медицинскиот персонал, објавија денеска американските медиуми.
Официјални лица од болницата Newton-Wellesley
во Бостон објавија дека досега се идентификувани пет случаи на тумори, но сите се бенигни, пишува New York Post.
Сите случаи се регистрирани на петтиот кат во болницата, во одделот за породување. Една од болните медицински сестри изјави, пак, дека на дури десет вработени во ова одделение во изминатите години им бил дијагностициран тумор на мозокот, кој во некои случаи бил од малигна природа.
Таа изјави за Си-Би-Ес дека три или четворица нејзини колеги веќе биле оперирани и ја обвини болницата дека не дава доволно поддршка.
Според неа, сите тие случаи на тумор не можат да бидат случајност.
Во декември минатата година болницата покрена истрага во која учествуваа нејзини стручњаци, како и претставници на Министерството за професионално здравје, како и консултант за квалитет на воздух, вода и радијација.
„Врз основа на резултатите од темелната истрага, сакаме да го увериме нашиот персонал и сите пациенти дека нема ризик за животната средина во болницата Њутн-Велсли“, се вели во соопштението на болницата.
Здружението на медицински сестри од Масачусетс (МНА) сепак не беше задоволно од овие наводи, објавувајќи дека тестовите извршени во болницата не биле сеопфатни, па започна сопствена истрага, која е во тек.
