Новиот германски министер за внатрешни работи, Александар Добриндт, денес изјави дека автоматското прифаќање на мигранти што влегуваат во земјата повеќе не важи и дека границите на Германија се контролирани построго веќе една недела.
За време на обиколката на граничниот премин со Австрија во Киферсфелден, Добриндт изјави дека од 6 мај, кога владата на канцеларот Фридрих Мерц ја презеде функцијата, се спречени 739 обиди за нелегален влез во земјата, објави Дојче веле.
Според него, во неделата пред тоа биле спречени само 511 нелегални влегувања во Германија.
Тој истакна дека е постигнато зголемување од 45 проценти во спречувањето на нелегалниот влез во Германија и дека тоа е можно само затоа што на границата се распоредени дополнителни 3.000 полицајци.
Добриндт рече дека претходно на границата биле распоредени 11.000 полицајци, а дека сега има 14.000.
Министерот истакна дека новата влада ја најави борбата против нелегалната миграција за време на изборната кампања и дека сега сака да ја спроведе. За разлика од претходната пракса, барателите на азил сега се одбиваат на границата и не им е дозволен влез во земјата, со исклучоци направени само за одредени групи како што се бремени жени и деца. „Сакам да испратам порака до сите оние кои мислат дека можат да заработат пари од човечкото страдање со шверцување луѓе во други земји, дека ќе направиме сè што можеме за да ги спречиме овие криминални активности“, рече Добриндт.
