Украинскиот претседател Володимир Зеленски се сретна со американскиот претседател Доналд Трамп во Белата куќа. Пред двајцата лидери да се повлечат на билатерален состанок, тие одговараа на прашања од новинарите во Овалната соба.
Трамп го одржа поголемиот дел од разговорот, додека Зеленски претежно молчеше. Најинтересниот момент се случи кога Брајан Глен, новинар на десничарската веб-страница „Real America’s Voice“, кој го критикуваше Зеленски во февруари затоа што не носел костум во Белата куќа, се јави на збор.
Овој пат, Зеленски носеше темно одело наместо воена униформа, за што Трамп коментираше велејќи дека изгледа одлично. Кога Глен се јави на збор, тој го пофали изгледот на Зеленски и јавно му се извини за претходниот инцидент.
„Изгледаш фантастично“, рече новинарот.
Трамп потоа го потсети Зеленски дека ова е „истиот новинар што го нападна минатиот пат“.
Потоа следеше ново извинување, но и духовит одговор од украинскиот претседател: – „Се пресоблеков, а вие носите исто одело како минатиот пат“, возврати Зеленски, предизвикувајќи смеа кај сите присутни.
Аналитичарите на Би-Би-Си оценуваат дека оваа размена, иако изгледа случајна, има политичка тежина. Трамп, велат тие, придава големо значење на почитувањето на формата и институцијата на претседателот, па затоа Зеленски веројатно освоил важен поен кај него со овој потег.
„Украинската делегација и нивните европски сојузници несомнено ќе бидат задоволни од начинот на кој Зеленски ја спроведе размената на впечатоци“, заклучува Би-Би-Си.
