Потпретседателот на САД, Џ.Д. Венс, денес изјави дека Русија отфрла каков било формат за преговори за прекин на војната против Украина.
„Соединетите Американски Држави остануваат посветени на мирот, но за жал, во текот на изминатите неколку недели видовме дека Русите одбиваат да учествуваат на какви било билатерални состаноци со Украинците. Тие одбиваат да учествуваат на какви било трилатерални состаноци каде што претседателот на Соединетите Американски Држави (Доналд Трамп) или други членови на администрацијата би можеле да седнат на преговарачка маса со Русите и Украинците“, изјави тој за Фокс њуз.
Тој нагласи дека ставот на САД е активно стремење кон мир „од самиот почеток на администрацијата на претседателот Трамп“.
„Мислам дека реалноста на теренот се промени, каде што Русите убиваат многу луѓе и губат многу луѓе, а немаат многу што да покажат за тоа. Уште колку луѓе се подготвени да изгубат? Уште колку луѓе се подготвени да убијат за многу мала, ако воопшто, воена предност во оваа област? Се надевам дека одговорот не е толку голем“, рече Венс.
Соединетите Американски Држави ќе продолжат да работат кон мир, рече Венс, додавајќи дека се надева оти „Русите конечно ќе се разбудат и ќе ја видат реалноста на терен“.
Тој рече дека бројот на жртви и економските последици го промениле ставот на Трамп за војната меѓу Русија и Украина.
„Руската економија е во урнатини. Русите не добиваат многу на бојното поле. Јасно е дека е време да го послушаат неговиот страствен апел да дојдат на преговарачката маса и навистина сериозно да разговараат за мирот“, рече Венс.
Кога беше прашан дали би поддржал испраќање ракети „Томахавк“ со долг дострел во Украина, што украинскиот претседател Володимир Зеленски го побара од Трамп за време на нивниот состанок во Обединетите нации, Венс одговори дека тоа е нешто за кое Трамп ќе ја донесе конечната одлука.
