Лидерката на Алтернатива за Германија -АфД (AfD) Алис Вајдел остро ги критикуваше денешните протести против основачкиот конгрес на новата младинска организација на АфД во Гисен и истакна дека тоа е нешто што е длабоко недемократски.
На отворањето на собирот, што започна со големо задоцнување поради протестите, таа оцени дека станува збор за подготвеност за насилство што е навистина застрашувачка и апелираше до демонстрантите да се разоружаат и да се однесуваат кон полицајците „со сочувство и почит“, објавува „Велт ам Зонтаг“„ (Welt am Sonntag).
Таа, исто така, рече дека медиумите се делумно виновни за политичката клима во Германија, како и дека учесниците на собирот биле „наклеветени“.
Вајдел рече дека пратеникот на АфД, Јулијан Шмит, бил претепан во Гисен, што тој го потврди велејќи дека бил нападнат од група од 20 лица кога го паркирал својот автомобил во близина на салата за митингот.
Во Гисен, од утрово на неколку места се одржуваат протести против основачкото собрание на младинскиот сојуз на АфД, а демонстрантите блокираа неколку приоди, што доведе до судири со полицијата.
Демонстрантите фрлаа камења кон полицијата, а полицијата одговори со водни топови и бибер спреј.
Околу 10 лица се јавија во локалната здравствена установа поради полесни повреди.
Организаторите на протестот изјавија дека во нив учествувале помеѓу 15.000 и 20.000 лица.
