Волк што беше фатен во Хамбург минатата недела откако касна жена во трговскиот округ во северниот германски град е пуштен во дивината, објави ДПА, повикувајќи се на локалните власти.
Младото животно беше опремено со предавател и беше пуштено назад во неговото природно живеалиште вчера, соопштија властите, без да ја откријат областа каде што беше пуштен волкот.
Сенаторката за животна средина на Хамбург, Катарина Фегебанк, рече дека враќањето на животното во неговото природно живеалиште е „правно исправна одлука што ги зема предвид и човековата безбедност и благосостојбата на животното“. Благодарение на предавателот, ловџиските групи можат да интервенираат ако волкот повторно се приближи до населени места, додаде Фегебанк.
Диво животно за прв пат беше забележано во Хамбург кон крајот на минатиот месец. Вечерта на 30 март, волкот влезе во трговски центар во близина на станицата Алтона, каде што касна жена во нејзините 60-ти години. Потоа волкот почна да трча низ градот и скокна во езерото Биненалстер во центарот на Хамбург, од каде што подоцна беше отстранет од страна на полициските службеници.
Според службата предводена од Фегебанк, волкот се испаничил и се обидел да избега низ автоматските стаклени врати и во еден момент ја каснал жената. Сепак, очевидци велат дека животното само скокнало врз жената, но без да ѝ наштети.
Вчера, околу 100 луѓе се собрале на демонстрации на местото каде што бил заробен волкот, барајќи да биде ослободен.
МИА
