Иранскиот министер за надворешни работи Абас Арагчи изјави дека Иран и Оман заеднички ќе управуваат со Ормуската Теснина во согласност со меѓународното право, јави Анадолија.
Во изјава што ја пренесе иранскиот државен радиодифузен сервис ИРИБ, повикувајќи се на либанската телевизија „Ал Мајадин“, Арагчи рече дека Иран и Оман, како двете држави што граничат со овој стратешки поморски премин, имаат „природно право“ да ги координираат и носат одлуките поврзани со неговото управување.
Тој наведе дека Техеран ќе разменува мислења со земјите од Персискиот Залив за случувањата поврзани со теснината, но нагласи дека конечните одлуки за нејзиното управување ќе ги носат Иран и Оман.
Според Арагчи, напорите на двете земји се насочени кон обезбедување безбедно поминување на сите бродови низ Ормуската Теснина во согласност со меѓународното право.
Во истото интервју, шефот на иранската дипломатија изјави дека комуникацијата со врховниот лидер на Иран, Моџтаба Хамнеи, продолжува непречено и дека неговите насоки се добиваат навремено и прецизно се спроведуваат.
Тој додаде дека постои широк национален консензус околу иранското раководство и оцени дека државните работи се движат „во многу добра насока“.
