Долгорочниот буџет на Европската Унија би можел да се соочи со значаен дефицит доколку земјите-членки не постигнат договор за нови даночни приходи, додека трошоците за сервисирање на заедничкиот европски долг продолжуваат да растат, предупреди Европскиот суд на ревизори (ЕСА).
„Важно е да се напомене дека околу 20 проценти од предложениот буџет од два билиона евра зависи од нови извори на приходи што сè уште не се одобрени“, изјави претседателот на Европскиот суд на ревизори, Тони Марфи.
Како што предупреди Марфи, доколку овие приходи не се реализираат, ЕУ би можела да се соочи со значителен буџетски дефицит, кој, како што истакнува тој, би барал поголеми придонеси од земјите-членки или намалување на вкупните буџетски амбиции.
Таа проценка доаѓа во момент кога земјите-членки на ЕУ остануваат длабоко поделени околу вкупниот обем на буџетот и начинот на неговото финансирање, додека се тркаат со времето за да постигнат договор за буџетот за периодот од 2028 до 2034 година пред крајот на годината, објави Репортер.
Европската комисија претходно предупреди дека буџетот на ЕУ би можел да се намали за 40% доколку главните градови не успеат да се договорат за нови давачки на ниво на ЕУ, познати како сопствени ресурси, и истовремено одбијат да ги зголемат своите национални придонеси.
