Илјадници Шпанци се собраа денеска на улиците на Мадрид со барање до Владата да преземе чекори за запирање на депопулацијата на руралните области.

Маршот е организиран од движења кои доаѓаат од руралните области на таа земја, а неговата цел е да привлече внимание кон проблемот со зголемената имиграција на жителите во големите градови во Шпанија.

-Веќе не сакаме празни ветувања, сакаме инвестиции, порачаа собраните граѓани.

Во Шпанија, 90 отсто од населението живее на 30 отсто од нејзината територија, пред се во Мадрид и во крајбрежните области, додека преостанатите површини остануваат празни.

Околу 80 проценти од селата и градовите со помалку од илјада жители се соочуваат со ризик да останат целосно празни.

Шпанската Влада во петокот објави мерки за подобрување на интернет-мрежата во руралните средини.

Маршот доаѓа пред парламентарните избори што ќе се одржат во Шпанија на 28-ми април.