Агенцијата за аудио и аудиовизуелни медиумски услуги ги повикува политичарите да се воздржат од тужби кон медиумите и да не ја загрозуваат слободата на изразување.
Најавите за тужби, посочуваат, претставуваат директен притисок врз работата на медиумите особено кога известуваат за теми од висок степен на јавен интерес.
– Медиумите се чувари на јавниот интерес и креатори на јавната свест и затоа мора во интерес на јавноста, да објавуваат сеопфатни и проверени информации. Како што е наведено во Декларацијата за слободата на политичка дебата во медиумите на Советот на Европа „правото на слобода на изразување со себе носи обврски и одговорности за кои вработените во медиумите мора да водат сметка“, се вели во соопштението од Агенцијата.
Воедно ги потсетува претставниците на власта дека со самото прифаќање на функцијата прифатиле да бидат предмет на јавна политичка дебата, а со тоа и предмет на надзор на јавноста и на потенцијално силна јавна критика преку медиумите во поглед на начинот на кој ги извршуваат своите функции.
Агенцијата постојано апелира првенствено да се користи правото на исправка или одговор наместо директно да се прибегнува кон тужби против новинари и медиуми, особено кога станува збор за носители на јавни функции.
Вчера имаше вистинска канонада од најави за тужби за новинари и медиуми почнувајќи од премиерот Зоран Заев, вицепремиерката Радмила Шеќеринска, министерот Никола Димитров итн. Тие се заканија со тужби за новинари и медиуми затоа што објавиле информации во кои не се фали власта дека блеска, туку за криминал и корупција.
Инаку, познато е дека токму тие се залагаа за свиркачи и високо ги ценеа во времето пред да дојдат на власт, а ја ценеа и слободата на медиумите.
