БАЛКАНОТ СЕ ТРЕСЕ ОД ЗЕМЈОТРЕСИ: Серија од потреси во Албанија со епицентар кај Тирана и еден во Хрватска во близина на Загреб

Земјотрес со интензитет од 3,4 степени според Рихтеровата скала утрово е регистриран во Албанија, соопшти Европско-медитеранскиот сеизмолошки центар (EMSC).

Епицентарот бил на 23 километри североисточно од Тирана, на длабочина од шест километри.

Седум земјотреси ноќеска во областа Клос, североисточно од Тирана

Седум земјотреси се регистрирани во Албанија од синоќа до утрово во областа Клос, североисточно од Тирана.

Од синоќа во 20 часот и 30 минути до утринава во 6 часот и 36 минути во тоа подрачје се регистрирани седум земјотреси со јачина од 2 до 3,5 степени според Рихтеровата скала, јави Еј-Би-Си Њуз.

Тресењето на земјата е почувствувано и во Тирана, но нема материјална штета.

Слаб земјотрес во близина на Загреб

Земјотрес со интензитет од 2,9 степени според Рихтеровата скала е регистриран во 10 часот и 4 минути во близина на Загреб, соопшти Сеизмолошката служба на Хрватска.

Како што е објавено на веб-страницата на таа служба, епицентарот бил во близина на Загреб, а интензитетот во епицентарот бил ЕМС од III-IV степен.

Порталот Индекс објави дека Европско-медитеранскиот сеизмолошки центар неколку минути по земјотресот објавил дека епицентарот бил на 10 километри од градот, а првата проценка на јачината била 2,7 степени според Рихтеровата скала.

Граѓаните во своите коментари изјавија дека слушнале силен татнеж.