Британскиот премиер Кир Стармер размислува за значително зголемување на воените трошоци на земјата, дознава Би-Би-Си, велејќи дека помошниците на премиерот сега разгледуваат предлози за исполнување на целта за издвојување на три отсто од БДП за одбрана до крајот на тековниот парламентарен мандат, кој би можел да трае до 2029 година.
Даунинг стрит ја разгледува идејата за исполнување на постојната цел за одбранбени трошоци порано од планираното, што потенцијално би чинело милијарди фунти, соопшти британскиот јавен сервис.
Стармер го сигнализираше својот став на Минхенската безбедносна конференција за време на викендот, велејќи им на светските лидери: „За да се справиме со пошироката закана, јасно е дека ќе треба да трошиме повеќе и побрзо“.
Минатата година тој вети дека ќе потроши 2,5 проценти од БДП за основна одбрана до април 2027 година.
Стармер, исто така, постави цел за зголемување на тие трошоци на три проценти од БДП во следниот парламент. Според Би-Би-Си, помошниците на премиерот сега разгледуваат предлози за исполнување на таа амбиција од три проценти до крајот на тековниот парламентарен мандат, кој би можел да трае до 2029 година.
Не е донесена одлука, а Министерството за финансии наводно е претпазливо во врска со предлогот.
Идејата беше дискутирана на клучен состанок на премиерот и неговите советници претходно овој месец, каде што тие разгледаа како најдобро да ги исполнат постојните обврски за одбрана. Извештаите од минатиот месец сугерираа дека на Министерството за одбрана на Велика Британија му се потребни дополнителни 32 милијарди евра за да ги покрие постојните трошоци во следните четири години.
Велика Британија потроши околу 2,3 проценти од БДП за одбрана минатата година, што е околу 75 милијарди евра. Велика Британија, заедно со сите други членки на НАТО, исто така се обврза да потроши 3,5 посто од БДП за основна одбрана до 2035 година.
