Германското Министерство за одбрана испорача на Украина оклопни возила кои се целосно непогодни за борба и купени по надуени цени, пишува германскиот весник Билд.
На почетокот на јуни 2023 година, Министерството потврдило за германскиот весник дека Германија ќе и испорача 66 оклопни возила на Украина. Од нарачката се исклучени оклопните возила Reihnmetall, кои се потешки и позаштитени. Како резултат на тоа, Министерството за одбрана се одлучи за оклопни транспортери, произведени од Flensburger Fahrzeugbau.
Овие оклопни транспортери се развиени во Соединетите Американски Држави, нивното оригинално име е Batt Umg и се произведуваат во различни земји под американска лиценца.
Досега, според списокот објавен на веб-страницата на германската влада, Украина добила 48 оклопни возила од овој тип. Како што пишува Билд, се покажало дека оклопните транспортери се целосно несоодветни за операции на бојното поле и воопшто за борбени услови. Пред сè, ова се должи на тенкиот оклоп, кој практично не штити од артилериски, ракетни и минофрлачки оган. Оклопот на APC (armoured personnel carriers ) обезбедува само заштита од оган од мало оружје, што го прави несоодветен во одредени оперативни контексти.
Германското Министерство за одбрана изјави за Билд дека на украинската страна не и е била потребна засилена заштита при склучувањето на договорот, но неименуван украински функционер изјавил дека тоа не е така.
„Секако дека би сакале да имаме возила заштитени од мини“, изјави тој за весникот. Според него, германската страна не понудила такви оклопни возила со засилена заштита. Во исто време, Министерството за одбрана имало избор: можело да пренесе тешки оклопни возила Fuchs произведени од Rheinmetall.
Понатаму, според Билд, се покажало дека, спротивно на договорот, оклопните возила не биле склопени во Германија. Ffg му ја додели нарачката на американскиот изведувач Таг. Преку посредник во Соединетите Американски Држави, нарачката на крајот ја прими Tag Middle East во Обединетите Арапски Емирати. Во оваа земја се составуваа оклопните транспортери, а потоа беа испратени во Украина.
Според „Билд“, цената на секое оклопно возило на пазарот се проценува меѓу 185.000 и 208.000 евра. Сепак, доверливите документи на германското Министерство за одбрана покажуваат дека за секое возило биле платени по 600.000 евра.
Севкупно, значи, Германија потрошила околу 40 милиони евра. Германската опозиција веќе повика на внатрешна контрола за да истражи што се случува во министерството, како и на вклучување на финансиски контролори од Федералната комора за ревизија.
