Американскиот државен секретар Ентони Блинкен ги нарече активностите на Русија околу најголемата нуклеарна централа во Украина, Запорожје, „врв на неодговорност“, обвинувајќи ја Москва дека ја користи како „нуклеарен штит“ во нападите врз украинските сили.
– Вашингтон е длабоко загрижен што Москва сега ја користи нуклеарната централа како воена база и пука врз украинските сили од нејзината околина, изјави Блинкен за новинарите во Њујорк.
– Се разбира, Украинците не можат да возвратат со цел да избегнат страшна несреќа во нуклеарната централа, рече тој.
Акциите на Русија отидоа подалеку од користењето „човечки штит“, рече Блинкен, нарекувајќи го „нуклеарен штит“.
На 20 јули Русија ја обвини Украина дека испукала два дрона во Запорожје, која е и најголемата нуклеарна централа во Европа, но посочи дека реакторот не е оштетен.
