Во Бугарија утре се одржуваат парламентарни избори откако претходните минатата пролет завршија нерешено, но сега веќе не е извесно дека партијата на поранешниот премиер Бојко Борисов ќе биде релативен победник.
И покрај секојдневните антивладини протести минатото лето, низата скандали и политичкиот замор околу нејзиното речиси 10-годишно владеење, партијата ГЕРБ на поранешниот 62-годишен телохранител со црн појас во карате, успеа да биде прва на изборите во април.
Но, другите партии во крајно расцепканиот Парламент одбија да владеат со него и не успеаја да постигнат ниту договор за алтернативна коалиција, објави Индекс.хр.
Поради тоа беше назначен преоден кабинет и беа распишани нови предвремени избори кои ќе се одржат утре.
Се чини јасно „кој нема да владее“ бидејќи ГЕРБ повторно ќе биде изолиран, смета Јулиус Павлоф, директор на Центарот за анализа и маркетинг во Софија.
– Но, кого гласачите сакаат да бидат на власт? Прашањето останува отворено, рече тој.
Се чини дека нема лесен одговор бидејќи анкетите предвидуваат уште еден расцепкан Парламент и веројатното преминување на шест политички групи над прагот од четири проценти од гласовите.
Партијата Има таков народ (ИТН), основана на почетокот на минатата година од поранешниот телевизиски водител и шоумен Слави Трифонов (54), според последната анкета, доби околу 21 процент од гласовите, речиси колку ГЕРБ.
Трети или четврти избори?
Веќе ослабениот Борисов неодамна претрпе низа нови удари поради откритијата за лошо управување и обвинувања за корупција.
Покрај тоа, се случија и невидени санкции на САД против бугарски олигарси кои биле привилегирани за време на неговото владеење.
Но, дали неговите противници ќе успеат да го соберат потребното мнозинство и да постигнат договор за формирање влада?
Партијата ИТН веќе одби да соработува и со ГЕРБ и со опозициските социјалисти, традиционалните партии.
Наместо тоа, тој се надева дека ќе состави коалиција со партиите кои излегоа од протестите минатото лето, крајно десничарската Демократска Бугарија, која на анкетите освои 12 проценти од гласовите, и левичарската партија „Станете! Мафијата надвор!“, која има поддршка од пет до шест проценти од гласачите.
– За да добиеме стабилна влада … не можеме да исклучиме трети или четврти избори, истакна Тошко Јорданов, заменик претседател на ИТН.
– Земјата нема да пропадне, тоа е демократски процес, додаде тој во редок јавен говор на крајот од неконвенционалната изборна кампања во која повеќето партии избегнуваа интервјуа за медиуми.
Маици и автограми
Трифонов е најмалку зборлив од главните кандидати и комуницира само преку Фејсбук. Тој одржа само една средба со студентите, кои можеа да му постават прашања.
Тој изјави дека не сака да биде премиер, но е подготвен да преземе некоја друга функција.
Боријана Димитрова, директорка на бугарската агенција за испитување на јавното мислење „Алфа Рисрч“, очекува „кревки мнозинства и нестабилни коалиции“.
Павлоф предупреди и на последиците од уште еден неуспешен договор на партиите кои се против Борисов.
– Ако предизвикаат трети избори, гласачите строго ќе ги казнат, нагласи Павлоф.
Борисов, кој води кампања во преполни спортски сали во руралните области, сепак се надева дека ќе се врати на власт.
Тој посочува колку патишта и друга инфраструктура има изградено за време на неговиот мандат, фалејќи се со дипломатски успеси кои го „запреа мигрантскиот бран“ од соседна Турција.
Поддржувачите на ГЕРБ, облечени во маици со ликот на својот лидер и туркајќи се да добијат негов автограм на предизборните митинзи, се надеваат дека партијата ќе биде повторно прва, но веруваат дека победата, доколку биде постигната, ќе биде тесна.
– Се надеваме дека другите партии ќе бидат одговорни и ќе формираат влада, со или без нас, истакна Красимир Kјучуков, додека Борисов, облечен во фармерки и розова кошула, му даваше автограм.
