Претседателот на Бугарија Румен Радев за утре закажал консултативна средба на државниот врв за билатералните односи со Македонија и поканата што ја очекува од ЕУ за почеток на преговори за членство, објави news.bg.
Средбата, како што пренесува news.bg., ќе се одржи во 09:30 часот, а темата е „Преглед на билатералните односи меѓу Република Бугарија и РС Македонија во контекст на резултатите од работата на Мешовитата експертска комисија за историски и образовни прашања и очекуваната покана до РС Македонија за пристапување во ЕУ“.
Поканети се да присуствуваат премиерот Бојко Борисов, претседателката на Парламентот Цвета Карајанчева, вицепремиерката за правосудни реформи и министер за надворешни работи Екатерина Захариева, координаторите на парламентарните групи, претседателите на собраниските комисии за надворешна политика и за европски прашања и контрола на европските фондови, на изборната комисија, како и претставникот на Мешовитата експертска комисија за историски и образовни работи.
Бугарскиот вицепремиер и лидер на ВМРО-БНД Красимир Каракачанов, коментирајќи го неодамнешното интервју на претседателот Стево Пендаровски вчера изјави дека „доколку Комисијата за историски и образовни прашања нема рок, тогаш ќе нема рок и патот на С. Македонија кон Европската унија“.
– Неприфатливо е некој да мисли дека тие едноставно ќе ја искористат Бугарија само за влез во ЕУ, рече Каракачанов.
