Годишната инфлација во Бугарија е 5,1 процент во август, во споредба со 4,4 проценти во јули, според прелиминарната проценка на Евростат за хармонизираниот индекс на потрошувачки цени (HICP), јави БТА. Бугарија останува меѓу земјите од еврозоната со највисока инфлација, додека просечното ниво за валутната унија се зголеми на 3,3 проценти, во споредба со 2,9 проценти еден месец претходно.
Повисока годишна инфлација од Бугарија во август е пријавена само во Литванија – 5,8 проценти и Кипар – 5,2 проценти. Зад Бугарија се Шпанија со 4,5 проценти и Белгија со 4,2 проценти.
На месечна основа, потрошувачките цени во Бугарија се зголемија за 0,8 проценти во август.
Според прелиминарната проценка на Евростат, забрзувањето на инфлацијата во еврозоната главно се должи на енергијата. Цените во оваа група се зголемија за 14,3 проценти на годишно ниво во август, по зголемувањето од 10,3 проценти во јули.
Меѓу главните економии во валутната унија, Германија објави годишна инфлација од 2,9 проценти во август, Франција 2,7 проценти, Италија 3,2 проценти и Шпанија 4,5 проценти.
Најниска инфлација меѓу земјите претставени од Евростат е пријавена во Естонија од 1,3 проценти, по што следат Малта со 1,9 проценти и Финска со 2,4 проценти.
Податоците покажуваат значително забрзување на инфлацијата во еврозоната во последните месеци. Во август, таа достигна 3,3 проценти, што е за 1,3 процентни поени над среднорочната цел на Европската централна банка од 2 проценти.
