Власта на Заев неспособна дури и свидетелства да подели, на учениците ќе им се наплаќаат, што значи нема бесплатно образование, се истакнува во денешната реакција на ВМРО-ДПМНЕ во врска со недостигот на свидетелства за учениците и наплатувањето на истите во училишта кои имале стари залихи од обрасците.
-Апсолутната неспособност и неодговорност на Мила Царовска создаде целосен хаос во образованието. Учебната година на Царовска како министер ај што почна со доцнење од еден месец, ај што немаше ништо од помпезно најавуваната национална платформа за онлајн учење, ај што ги лажеше граѓаните за наводен фински концепт за да го оправда укинувањето на историјата како посебен предмет, ај што диктаторски се обидува да наметне антиреформи и измени на закони, спротивно на мислењето на јавноста и експертите, на крајот на годината и се случи најголемиот скандал, се вели во соопштението.
Имено, се додава во реакцијата, оваа година наместо во јуни свидетелства ќе се делат до почетокот на идната учебна година.
-Како ја почна учебната година, Царовска така и ја заврши, со тотален дебакл. Да биде скандалот поголем дел од училиштата им наплаќале да учениците за свидетелства, што е спротивно на законот кој предвидува бесплатно основно и средно образование и покажува дека некој прави бизнис на сета мака на учениците и родителите кои ја видоа оваа година со неспособната власт на Заев и катастрофалната Царовска. Нема свидетелства, нема пасоши, нема регистарски таблици, нема возачки дозволи, нема ништо за граѓаните. Граѓаните станаа граѓани од втор ред, а елитата на власт користи секакви привилегии. Тоа мора да престане, мора да победи концептот Македонија за сите луѓе, а ликовите како Заев и Царовска да понесат одговорност за своите политики, се вели во соопштението од опозициската партија.
Така, власта на Заев која долго се фалеше со укинувањето на радиодифузната такса, сега на родителите им ја наплатува преку разни давачки за нивните деца.
