Државната изборна комисија на денешната седница што почна во 18 часот ги отфрли сите 2.142 приговори поднесени од партиите за предвремените парламентарни избори.
За 1.478 приговори од вкупно 1.982 поднесени од Левица, членовите на Комисијата утврдија дека биле без потпис од овластениот претставник и немале печат од подносителот на листата, додека за другите 504 потенцираа дека не се поткрепени со докази и текстот во образложението е ист за сите овие приговори.
За приговорите на Алијанса на Албанците и на Алтернативата исто така беше оценето дека не се поткрепени со докази, како и на Демократи, на СДУ, на Интегра, МОРО Работничка партија и на ВМРО-ДПМНЕ.
Дел од партиите чии приговори се отфрлени бараа увид во избирачкиот материјал, како и на неважечките ливчиња, но тие не беа поткрепени со докази.
Партиите имаат право за овие одлуки на ДИК да се жалат до Управниот суд.
