По подолг период во земјава не е регистриран случај на починат пациент заболен од Ковид-19. Министерството за здравство вчера објави информација за нови 163 случаи и 69 оздравени пациенти со што вкупната бројка на Ковид дијагностицирани се искачи на 9.412, а на оздравени на 4.940 лица. Бројката на починати засега останува на 432.

Статистиката на Институтот за јавно здравје покажа дека во периодот од 13 до 19 јули се бележи намалување на бројот на новозаболени и оздравени лица, а се зголемува бројот на починати лица во однос на претходната недела.

Новозаболени се регистрирани во 26 града, а најмногу има во Скопје (39,9 отсто) и во Штип (14,4 отсто). Во 17 града, пак, бројот на новопотврдени случаи е под 20.

Она што е интересно е дека има промена во старосната структура на новозаболени, односно најголем процент заболени се на возраст од 40 до 49 години, а потоа следуваат лицата постари над 50 и 60 години.

Институтот за јавно здравје бележи и намалување за два отсто на бројот на хоспитализирани пациенти во однос на претходната недела, додека кај 275 лица или кај 29,5 отсто регистрирано е присуство на коморбидитети, што е за два отсто повеќе од претходната недела.

Во периодот од 13 до 19 јули регистрирани се 545 оздравени лица кои биле хоспитализирани или на домашно лекување, што е за 472 лица помалку од периодот од 6 до 12 јули. Пред ова намалување, три недели бројот на оздравени лица бележел раст за околу 40 отсто на неделно ниво.

Од друга страна, високи се и бројките на непочитување на препораките за носење на лична заштитна опрема на лицето. Полицијата вчера информираше за нови 385 прекршувања за неносење на заштитна маска, а вчера е поднесена и кривична пријава против локалот во Струмица кој организираше забава и настап на естраден уметник и музичка група непочитувајќи ги здравствените протоколи и протоколите за работа.

-Од преземените мерки и обезбедените докази било утврдено дека правното и одговорно лице дозволиле во времето од 21:00 до 01:00 во објектот да се одржи настап на естрадниот уметник и музичката група, воедно дозволиле и присуство на неограничен број гости кои биле послужувани на шанк и стоечки маси, со што постапиле спротивно на Протоколот за отварање и работа на кафетериите, а кој протокол произлегува од Планот за намалување на рестриктивните мерки за спречување на ширење на коронавирусот, информираше СВР Струмица.

Апликацијата „СтопКорона“ ја презеле околу 63 илјади граѓани

Една од мерките насочени кон спречување на ширењето на вирусот е и апликацијата „СтопКорона“ која досега ја инсталирале 62.979 граѓани. Апликацијата е наменета за откривање близок контакт со потенцијално заразени лица.

Од Министерството за здравство вчера информираа дека преку апликацијата не се откриени нови позитивни случаи на коронавирусот.

– Епидемиолозите секојдневно детално ги следат сите достапни методи за откривање на контакти на позитивни случаи на корона вирусот, а со цел нивно рано откривање и тестирање, информираа вчера од Министерството за здравство.