На Самитот во Тирана, премиерот Христијан Мицкоски ќе оствари средбa со премиерот на Обединетото Кралство, Кир Стармер.
На средбата се очекува да се постигне согласност за договор за стратешко партнерство на земјава со Обединетото Кралство на Велика Британија и Северна Ирска.
Ова претставува стратешки договор кој ја позиционира државата во редот на интересите и делувањето на една од највлијателните политички и економски сили во светот како што е Обединетото Кралство.
Овој договор претставува ново поглавје во односите меѓу двете држави и претставува клучна основа за подоцнежна економска и политичка соработка.
Самиот договор се преговараше повеќе месеци меѓу тимови од двете држави и вклучува членови за блиска соработка во повеќе клучни области.
Се очекува повеќе информации во текот на денот.
Нашето присуство и учество на Самитот на Европската политичка заедница во Тирана е потврда за нашата заложба за активно учество во европските процеси и градење стабилно и просперитетно соседство, порача премиерот Мицкоски на Фејсбук.
-Денеска присуствував на Самитот на Европската политичка заедница, заедно со лидерите и претставниците на земјите од Западен Балкан. Самитот е посветен на унапредување на регионалната соработка, стабилноста и приближувањето кон ЕУ, при што се потенцираше важноста од заедничко дејствување пред предизвиците со кои се соочува нашиот континент. Во отворената дискусија се разменија ставови за клучни теми за зајакнување на поврзаноста на регионот со остатокот од Европа, напиша Мицкоски на својата Фејбук страница.
Во Тирана денеска се одржува шестиот Самит на Европската политичка заедница на тема „Нова Европа во новиот свет: единство – соработка – заедничко дејствување“ на кој учествува и премиерот Мицкоски. Главна тема на Самитот, чии кодомаќини се претседателот на Европскиот совет, Антонио Кошта и албанскиот премиер Еди Рама, се безбедноста и заедничката визија за иднината на Европа.