Договорот од Преспа е храбар и фер компромис што ќе ја стави Македонија на патот кон ЕУ и НАТО и ќе и осигура светла иднина, истакнува поранешниот претседател на САД во обраќањето до граѓаните на Република Македонија.

Во писмо до македонскиот народ, што го објави Атлантскиот совет во Вашингтон, Буш пишува дека уште од првиот ден на македонската независност Соединетите Американски Држави се постојан пријател на земјата и граѓаните.

– Американскиот народ се восхитуваше на вашето мирољубиво издигнувње од пепелта на Југославија. Ја почитуваме вашата храброст да се придржувате до демократските вредности и слободните институции. И го поддржуваме вашиот стремеж за остварување на напредок и безбедност во Европа, која е цела, слободна и живее во мир, вели Буш.

Тој нагласува дека како претседател на САД имал чест да го поддржи претседателот Трајковски во 2001, кога тој ја оттргнал Македонија од работ на граѓанската војна во правец на општество дефинирано со мултиетничко разбирање и владеење на правото.

– И бев горд кога Соединетите Држави ја признаа Република Македонија под нејзиното уставно име во 2004, вели Буш.

Истакнува дека договорот од Преспа ќе осигура светла иднина, која претседателот Трајковски ја имал замислено.

– Ги повикувам сите граѓани на Македонија да учествуваат во носењето на оваа историска одлука и да гласаат на националниот референдум. После една деценија на пречки, сега ја имате моќта да напишете една нова и понадежна приказна за вас, за вашите деца, за вашите соседи и за вашата земја, вели Буш во писмото.

Буш додава дека претседателот Трајковски бил „човек со интегритет, решителност и, најмногу од се, човек со верба“. Тој, вели поранешниот претседател во писмото, имаше верба во Господ, верба во својата земја и нејзините луѓе, како и верба во способноста на нејзините лидери да носат мудри одлуки.