Европската комисија утре ќе донесе одлука за блокирање на планираното спојување на подружниците за производство на шински возила на германскиот гигант „Сименс“ и на француската компанија „Алстом“, јави ДПА, повикувајќи се на извори во Брисел.
Двете компании сметаат дека спојувањето ќе им овозможи поголема конкурентност со странските ривали, како што е кинескиот ЦРЦЦ, чиј годишен промет е двојно поголем од оној што би го имала фирмата што би настанала со спојувањето на подружниците на „Сименс“ и „Алстом“.
Но, според изворите на ДПА, Европската комисија е загрижена дека новата компанија би можел да влијае негативно на конкурентноста во Европа.
– Сакаме силни европски компании што ќе можат да конкурираат на глобалната сцена. Но, ние никогаш… нема да фаворизираме некого кога станува збор за обезбедување еднакви услови за сите, изјави денеска претседателот на Еврокомисијата, Жан-Клод Јункер.
Со цел да добијат одобрување за планираното спојување на нивните подружници, „Сименс“ и „Алстом“ понудија да се откажат од околу четири отсто од сопственоста во новата компанија.
