Ниту САД ниту Русија нема да се обидат да употребат нуклеарно оружје, изјави денеска турскиот претседател Реџеп Тајип Ердоган по состанокот на шефовите на разузнавачките служби на двете земји во Анкара.
– Според информациите што ги добив од мојот директор на разузнавачката служба за САД и Русија, ниту една од нив нема да се обиде да употреби нуклеарно оружје, подвлече Ердоган, пренесува Анадолија.
Шефот на ЦИА, Вилијам Бернс и неговиот руски колега Сергеј Наришкин имаа средба на почетокот од неделата во Анкара, потврдија претходно од кабинетот на Ердоган.
Тогаш Бернс, како што наведува Белата куќа, го предупреди рускиот шеф на разузнавачката служба за последиците со прибегнување кон нуклеарно оружје, што Русија се закануваше дека ќе го употреби во Украина.
Како што информираше Белата куќа за состанокот, „не се работеше за какви било преговори“ ниту за „разговори за решавање на војната во Украина“.
