Турскиот претседател Реџеп Таип Ердоган синоќа во ОН повика да се најде достоинствен излез за сите страни од војната во Украина.
– Заедно мораме да најдеме разумно дипломатско решение кое на двете страни ќе им понуди достоинствен излез од кризата, рече Ердоган во обраќањето на генералната дебата на сесијата на Генералното собрание на ОН во Њујорк.
Турскиот претседател додаде дека треба да се интензивираат напорите за ставање крај на војната врз основа на територијалниот интегритет и независноста на Украина.
Ердоган додаде дека треба да победи фер мировен процес и потсети дека од почетокот на руската инвазија на Украина, Турција успеа да собере претставници на Русија и Украина на своја територија.
Турскиот претседател, кој успеа да одржи врски и со Москва и со Киев од почетокот на руската инвазија врз Украина на 24 февруари, редовно се нуди да посредува во конфликтот, повторувајќи ја потребата да се најде договор што ќе ги задоволи двете страни, пренесе Бета.
