САД поставија пет главни услови во својот одговор на предлогот на Иран, поврзани со нуклеарната програма на Иран и замрзнатите средства, објави денеска иранската новинска агенција Фарс, повикувајќи се на извори.
Според агенцијата, американската страна го отфрлила барањето за исплата на какви било компензации кон Иран и побарала предавање на залихите со високо збогатен ураниум.
Вашингтон, исто така, барал само една нуклеарна централа да остане оперативна во Иран, јавува Ал Џезира повикувајќи се на Фарс.
Како што се наведува, американските услови предвидуваат крајот на конфликтот на сите фронтови да биде условен од продолжување на преговорите.
САД, според истите извори, не се согласни со ослободување на 25 проценти од замрзнатите ирански средства.
Претходно, на 10 мај, Пакистан потврди дека добил одговор од Иран на предлогот на САД за прекин на војната и го проследил до Вашингтон.
Неименуван ирански функционер изјави за Ал Џезира дека како одговор, Техеран изразил подготвеност за разговори за прекин на непријателствата во регионот, вклучително и во Либан, за нуклеарната програма, санкциите и безбедноста на Ормуската Теснина, со барање за јасни меѓународни гаранции и целосно укинување на сите рестриктивни мерки.
Според изворот, одговорот на Иран вклучувал разговори за постигнување договор со САД, а во исто време инсистира на целосно укинување на сите санкции.
Техеран, како што е наведено, бара јасно дефиниран механизам за укинување на санкциите што би го гарантирала меѓународната заедница, како и цврсти меѓународни гаранции за спроведување на евентуален договор со Вашингтон.
Одговорот, исто така, сугерирал разгледување на пошироката регионална рамка, вклучувајќи ги прашањата за безбедноста во Ормуската Теснина и иранската нуклеарна програма, со оценка дека преговорите треба да се базираат на „врховни државни интереси“ и консултации со земјите во регионот.
Предложениот меморандум на САД, на кој одговори Иран, содржи 14 точки, вклучувајќи ја посветеноста на Иран на мораториум за збогатување на ураниум, заедно со постепено укинување на санкциите на САД и ослободување на замрзнатите ирански средства.
