Ефикасноста на вакцините против Ковид-19 ја потврдуваат многу анализи. Вакцините штитат од тешка форма на болеста, од хоспитализации и смртен исход. Анализите на Министерството за здравство утврдија дека меѓу 79 отсто и 81 отсто од хоспитализираните пациенти со Ковид-19 се невакцинирани, објави на својот фејсбук профил министерот за здравство Венко Филипче.
Тој посочува дека истражувањето на Цивика мобилитас потврдува дека во последните три и пол месеци има 14.500 помалку заразени, 4.595 помалку неделни хоспитализации, вакцинацијата ја намалила хоспитализацијата меѓу 37,9 отсто и 46,5 отсто, а трошоците за хоспитализација во последните пет недели од делта бранот се пониски за 2,8 милиони евра.
– Вакцинацијата против Ковид-19 е важна и ќе помогне да запре пандемијата. Вакцините функционираат заедно со вашиот имунолошки систем, така што ќе бидете подготвени да се борите против вирусот доколку сте изложени на него. Ковид-19 може да има сериозни, опасни по живот компликации и не постои начин да се знае како вирусот ќе влијае на вас. #ВакцинирајСе! Со вакцината се штитите себе си, пријателите, семејството и ги штитите другите околу вас, напиша Филипче.
Министерот за здравство, Венко Филипче често потсетува дека вакцината е ефикасна, но дека граѓаните треба да ги почитуваат и антиковид мерките и протоколите, меѓу кои се носење маска, миење раце, држење растојание итн. Но, тие мерки не ги почитува потпретседателот на СДСМ Венко Филипче, на партиските митинзи што претходниот и овој месец се одржуваа во предизборната кампања за локалните избори.
Па, граѓаните се збунети, дали да му веруваат на партискиот потпретседател Филипче (од фотографијата) или на министерот Филипче од Фејсбук.
