Комисијата за заразни болести на денешниот состанок одлучи да и предложи на Владата, сите вработени во јавниот сектор и во локалната самоуправа при одење на работното место да прикажат потврда за примена најмалку една примена вакцина или ПЦР негативен тест кој ќе важи најмалку 72 часа, а ќе биде направен на сопствен трошок, изјави министерот за здравство Венко Филипче.

Вработените треба да прикажат или потврда за прележан ковид не постар од 45 дена, или пак потврда од лекар специјалист дека вакцината не можат да ја примат а тоа се оние ретки имунолошки состојби.

–Препорачуваме во овие мерки да се приклучат и приватните компании. Веќе имаме на некој начин потврда, очекуваме дека ќе може да се приклучат, со оглед на тоа што од Сојузот на стопански комори стигна едно писмо со слични барања, а се со цел да се заштитат производствените капацитети и целокупниот економски процес во земјата, изјави денеска Филипче по состанокот на Комисијата.

Уште една мерка е и препораката вакцинацијата да биде задолжителна за сите здравствени работници.  

Филипче напомена дека предлог е овие мерки да стапат на сила десет дена откако ќе ги усвои Владата за граѓаните да имаат временски период да се вакцинираат, а период од 30 дена да дадат на оние 20 до 30 проценти здравствени работници, кои во овој момент се уште не се уште вакцинирани.  

Како што рече, ќе бараат и да се ажурира процесот на контрола од страна на сите инспекторати и МВР.

-Имаме електронски алатки, не се само хартиените сертификати, туку европските сертификати може да се „данлаудираат“ на сите граѓани кои користат таков тип на мобилни телефони и на апликација која што го прикажува соодветниот код и има апликација што ја контролира валидноста на тој код, што значи дека се елиминира можноста да имаме фалсификувани сертификати. Апликациите ги има и во системот на гугл и во системот на ајфон, рече министерот за здравство.

Тој смета дека ова е една мерка со која значајно ќе се зголеми опфатот со вакцинација.

Филипче додаде дека после мини пикот од неколку дена кога се наполниле сите активни ковид центри во Скопје, во моментов ситуацијата делумно спласна. Но, како што рече, пред нас е зимска сезона, сезона на грипови и настинки.

-Има пациенти кои заболуваат и од други сериозни болести, мора да мислиме и на нив, не може да се занимаваме само со КОВИД и не може да правиме само КОВИД-центри, мора болниците да работат и за другите болести, за другите пациенти. Оваа мерка верувам дека ќе го зголеми опфатот со вакцинација и дефинитивно ќе се намали бројот на заболени од КОВИД.

Во овој момент, посочи Филипче, болниците ги оптоваруваат пациентите кои се заболени од КОВИД, а се невакцинирани. Тие се некаде близу 80 проценти од вкупниот број на КОВИД пациенти кои се лекуваат во нашите болнички установи.  

На новинарско прашање кој точно ќе ја прави таа верификација на вакциналниот сертификат или потврдата за ковид прележаност на влез во јавната самоуправа, Филипче рече дека ќе препорачат да има одговорно лице која ќе ја врши таа контрола.

-Ние ќе препорачаме да има одговорно лице, кое одговорниот во институцијата ќе го назначи да ја врши таа контрола на самиот влез во иснтитуцијата, и овие електронски алатки ќе овозможат тоа да биде брзо и сигурно, рече министерот за здравство.

Прашан дали кќе има итна владина седница за овие мерки, тој одговори дека новите мерки се однесуваат и на физичките и на правните лица кои треба да ги спроведуваат, а ќе ги дискутираат на следната владина седница.

Во однос на мерката за задолжително вакцинирање на сите здравствени работници, Филипче рече дека верува оти ќе има добар одзив, и сите здравствени работници ќе се вакцинираат.

-Јас верувам дека ќе има добар одзив и ќе прифатат да се вакцинираат сите. Во однос на ПЦР тест, тој треба да се прави еднаш неделно, и на тој начин се осигуруваме дека тие што не се вакцинирани се безбедни за околината во која што работат, рече Филипче.