Европратеникот Кнут Флекенштајн го поздрави потпишувањето на Протоколот за членство во НАТО, јави дописничката на МИА од Брисел.
Флекенштајн им го честиташе вчерашниот чин на премиерот Зоран Заев и министрите Никола Димитров и Радмила Шеќеринска преку Твитер и ги поздрави напорите на сите кои придонесоа за, како што вели, овој историски успех.
Ден пред ратификацијата на овој документ во Атина, Флекенштајн за МИА изјави дека фактот што Грција го потпиша протоколот вчера е „веќе голем успех”.
– Тоа јасно покажува дека оспоруваниот Преспански договор беше корисен и оти го исполнува своето ветување да се стави крај на долги година блокади за земјата, смета европратеникот од редовите на социјалдемократите.
Според Флекенштајн, иако НАТО не игра важна улога во процесот за ЕУ бидејќи не сите членки на ЕУ се членки на НАТО и обратно, сепак вчерашното потпишување испраќа важен сигнал.
– Се разбира, има земји за кои членството во НАТО е важно, но за мене успехот лежи во фактот што деценискиот спор за името не може повеќе да го сопре Скопје на патот кон Европската Унија, сега треба целосно да се посветат на потребните реформи, апелираше европарламентарецот.
