Француската влада почна да презема конкретни мерки за да се подготви за можни прекини на струја во различни делови на државата во текот на зимата, јави ДПА.
Премиерката Елизабет Борн ќе им наложи на регионалните власти да бидат подготвени за контролирани прекини на електрична енергија од не повеќе од два часа, соопшти прес-службата на француската влада.
Зимата може да биде студена и Франција мора да биде подготвена да реагира во случај да не може да обезбеди доволно електрична енергија за да ја задоволи побарувачката во одредени периоди.
Причина за тоа се проблемите со француските нуклеарни централи, забележува ДПА. Одржувањето на неколку нуклеарни централи е одложено, а голем дел од 56-те реактори во земјата се уште не се приклучени на мрежата.
Француската влада нагласи дека има договор за взаемна помош со Германија, кој предвидува Франција да испорачува природен гас за Германија и да добива струја во случај на потреба.
Доколку претстои прекин на струја, граѓаните ќе бидат детално информирани еден ден однапред преку посебна мобилна апликација.
Струјата нема да биде исклучена во болниците и другите важни објекти. Сепак, мерките ќе ги погодат железницата, метрото, училиштата, универзитетите…
Останува загриженоста дека прекините на струја може да ја нарушат телефонската мрежа.
Според француските власти, недостиг на струја може да се случи помеѓу 8 и 13 часот и меѓу 18 и 20 часот, кога потрошувачката е најголема. з
