Руската војска соопшти дека придружувала германски извидувачки авион над Балтичкото Море подалеку од рускиот воздушен простор.
Борбениот авион полетал за да го придружува германскиот поморски извидувачки авион Lockheed P-3 C Orion, соопшти Министерството за одбрана во Москва.
Авионот на германските вооружени сили, Бундесверот, свртел пред да стигне до рускиот воздушен простор. Рускиот борбен авион Су-27 потоа исто така се вратил на својот аеродром.
– Спречена е повреда на руската државна граница, соопшти руското Министерство за одбрана.
Портпаролот на германската морнарица за ДПА изјави дека авионот извршувал рутински извидувачки лет. Руски пресретнувач тогаш полетал во воздушниот простор во близина на Калининград за да набљудува. И тоа беше рутинска реакција, ништо не се случи, велат претставници на германската морнарица.
Тензиите во воздушниот простор над Балтичкото Море меѓу силите на НАТО и Русија се зголемија од почетокот на руската војна против Украина, која почна во февруари минатата година. Со ексклавата Калининград, Москва има силен воен пункт во регионот. Таму се наоѓа и руската балтичка флота.
