Холандија ќе даде поддршка за Македонија преку набавка на тестови за коронавирус базирани на нуклеарна технологија кои се развиени од страна на Меѓународната агенција за атомска енергија (МААЕ) и Светската здравствена организација.
Како што соопштија од холандската амбасада, се очекува тестовите да пристигнат во државата во наредните неколку дена. Тестовите се базираат на технологијата позната како реверзно транскрипциона полимеразна верижна реакција (real time RT-PCR), во моментов најсензитивната метода за детектирање на вирусот. МААЕ има опширно искуство во пренесувањето на знаење и на материјали. Технологијата користена за овие тестови е првично воспоставена за потребите на ветеринарниот сектор заедно со Организацијата за храна и земјоделство, а потоа доразвиена и искористена во рамките на справувањето со епидемиите на ЗИКА и ебола.
-Запирањето на пандемијата на коронавирус е од општ интерес за човештвото. Треба да работиме заеднички на глобално ниво за да ја ставиме под контрола , изјави холандскиот Министер за надворешни работи Стеф Блок.
Вкупната холандска поддршка за тестовите за коронавирус од МААЕ кои ќе бидат дистрибуирани во Македонија, Украина и Мароко изнесува 500.000 евра, наведуваат од Амбасадата на Холандија.
Оваа реакција на амбасадата се совпаѓа со преписката меѓу Министерството за здравство и Систина. Вчера низ медиумите се прошири веста дека во оваа приватна болница се откриени 50-тина заразени од корона вирусот, на што реагираше МЗ истакнувајќи дека тестовите на Систина не го откриваат вирусот, туку антителата, па секој кој се тестирал таму, а е позитивен, ќе мора да го повтори тестот во ИЈЗ.
Систина возврати со тоа дека станува збор за холандски тестови. Сега доаѓа и објавата на амбасадата која истакнува дека ќе помогнела во набавка на оние тестови кои ги користи Институтот за јавно здравје, како најсензитивни тестовi во овој момент во светот, очигледно сакајќи на тој начин да се дистанцира од споменувањето на Холандија во соопштението на Систина.
