Албанскиот претседател Илир Мета коментирајќи ја состојбата во неговата земја, високо ги оцени проевропските ставови на неговиот колега претседателот Стево Пендаровски и премиерот Зоран Заев во надминување на одредени прашања.
– Треба да имаме корист од позитивниот момент што Северна Македонија го постигна со Преспанскиот договор. Многу важно и за Албанија и за Северна Македонија е да ги отворат преговорите со ЕУ не само поради многу битното соседство, туку и заради одличното лидерство што го покажаа премиерот Заев и претседателот Пендаровски, како и за Албанците во Северна Македонија, кои беа извонреден фактор за европската интеграција на таа земја, но исто така и за нејзиното членство во НАТО, изјави Мета.
Мета го повтори веќе кажаниот став дека не треба да се губи време, бидејќи пред албанските граѓани и Албанија претстои значаен датум 17-18 октомври кога Советот на Европа треба да донесе одлука за отворање преговори со ЕУ, бидејќи, како што вели, на 19 октомври ќе биде предоцна за се.
– Неопходно е да бидеме многу одговорни и искрени пред Албанците, барем јас како претседател на Република Албанија, Рама како претседател на Владата и исто така сегашното владеачко мнозинство, секако, Баша како лидер на опозицијата, дека ако пред овој датум, односно 17-18 октомври не стигнеме да организираме сеопфатни локални избори, а во исто време не најдеме формула за надминување на оваа криза, есенскиот тест нема да го положиме, оцени Мета.
МИА
