Министерството за здравство соопштува дека „вакцинацијата се одвива непречено на сите пунктови низ државата, интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 438.879 граѓани.
Министерството апелира за масовно пријавување за имунизација, но според бројот на вчера вакцинирани само 6.521 лице нема масовна вакцинација. И вакцини нема доволно за масовна вакцинација, со оглед на тоа што секојдневно се најавува дека се чекаат од Кина, од Русија, од соседните земји итн.
Како што соопшти Министерството за здравство, на вакциналните пунктови во државата заклучно со вчера вакцинирани се вкупно 243 832 граѓани.
-Прва доза вакцина вчера примиле 2 249 граѓани, а вчера вкупно се вакцинирале 6 521 граѓани. Во државата вкупно се аплицирани 369 661 дози вакцини, а ревакцинирани се 125 829 граѓани. Со последните бројки 47 % од населението над 70 години имаат примено барем една доза вакцина, 41 % од населението над 65 години е вакцинирано со барем една доза вакцина и 35 % од населението над 60 години е вакцинирано со барем една доза вакцина, наведуваат од Министерството за здравство.
Вакцинацијата се спроведува согласно Националниот план за имунизација. Се вакцинираат возрасни лица, граѓани кои искажале интерес за вакцинација на веб страницата vakcinacija.mk , а се вакцинираат и лица вработени во критична инфраструктура. Масовна вакцинација се одвива во неколку градови во државата и тоа во А1 СЦ Борис Трајковски во Скопје, во спортските сали во Кавадарци, Куманово, Тетово, Штип, Битола, Струмица, Охрид, Велес и Прилеп.
Министерството за здравство апелира до граѓаните масовно да се пријавуваат на vakcinacija.mk бидејќи тоа е најлесниот и најбрз пат да се вакцинираат.
