Русија лансираше ирански истражувачки сателит во вселената кој ќе ја скенира топографијата на Иран од височина од 500 километри.
Сателитот „Парс 1“ е лансиран на руска ракета „Сојуз“ од космодромот Восточни во источниот регион Амур, тежи 134 килограми и е опремен со три камери.
– Нашите сегашни домашни бази за лансирање сè уште немаат можност да лансираат сателити на адекватен начин, затоа ја користиме руската база за лансирање, рече иранскиот министер за информации и комуникации Иса Зарепур. Космодромот Восточни е во функција од 2016 година и се наоѓа недалеку од руската граница со Кина и на околу 1.500 километри од пристаништето Владивосток.
Во 2022 година, Русија го испрати иранскиот далечински сателит Хајам во орбитата од казахстанскиот космодром Бајконур, што го одразува продлабочувањето на научната соработка меѓу двете земји кои се под американски санкции.
Фото: Јутјуб скриншот
