Според календарот на МПЦ (Јулијанскиот календар) денеска е 10 декември.
Денеска е Св. маченици Мина, Ермоген и Евграф.
Свети Мина беше римски војник во времето на цар Максимијан. Во една прилика, царот го испрати да ги смири нередите што беа настанале во Александрија и да ги гони тамошните христијани. Имено, царот не знаеше дека Мина и самиот е христијанин. Мина не само што не ги гонеше христијаните, туку многумина придоби за верата во Христос. Штом чу за тоа, царот го испрати Ермоген во Александрија. Овој го измачуваше свети Мина, но откако виде дека Бог на чудесен начин го исцели и самиот поверува во Христа. Тогаш самиот цар дојде во Александрија и ги погуби овие двајца, а со нив и еден незнабожечки писател Евграф, кој поверува гледајќи го примерот на свети Мина и Ермоген.
КАТОЛИЧКИ КАЛЕНДАР: Денеска е Св. Иван Кентијски.
Живеел во петнаесеттиот век. Имал побожни родители и се одликувал со невиност и добро однесување. Откако станал свештеник, добро го искористувал времето, посветувајќи им се на грижите на луѓето. Бил и професор на Краковската виша школа во Полска. Како вистински светец, им помагал на сиромашните. Овој светец на посебен начин се слави во Полска.
